უეფას ჩემპიონთა ლიგის 2025/26 წლების სეზონიდან, შესაძლოა, რამდენიმე წესი შეიცვალოს.

Bild-ის მიერ გავრცელებული ინფორმაციის მიხედვით, ევროპული ფეხბურთის მმართველი ორგანო ამ ეტაპზე კლუბებთან ჩემპიონთა ლიგაზე რეგლამენტით გათვალისწინებული რამდენიმე წესის ცვლილებას განიხილავს.

მოსალოდნელია, რომ ახალი სეზონიდან პლეი ოფის სტადიაზე დამატებითი ტაიმები გაუქმდება და ორმატჩიან დაპირისპირებაში ძირითად დროში დაფიქსირებული ფრის შემთხვევაში გამარჯვებული პენალტების სერიაში გამოვლინდება. მიიჩნევა, რომ ეს ინიციატივა ფეხბურთელების დატვირთვას გარკვეულწილად შეამცირებს.

ამასთანავე, განიხილება ის მოცემულობაც, რომ საერთო ჯგუფური ეტაპის შემდეგ, პლეი ოფში გასული საუკეთესო რვა კლუბი ყველა ეტაპზე პირველ მატჩს შინ ჩაატარებს. დავძენთ, რომ ეს წესი ამ ეტაპზე მხოლოდ მერვედფინალებში მოქმედებს.

ცვლილება შეეხება კიდევ ერთ წესს, რაც ითვალისწინებს იმას, რომ მეოთხედფინალამდე ერთი ქვეყნის წარმომადგენლები ერთმანეთს აღარ შეხვდნენ.

მოსალოდნელია, რომ რეგლამენტში გათვალისწინებულ ცვლილებებზე უეფა ოფიციალურ განცხადებას 30 მაისს, მიუნხენში გასამართ ასამბლეაზე გამოაცხადებს.